కర్నూలు జిల్లా దేవనకొండ మండలం బంటుపల్లి గ్రామానికి చెందిన గో సంరక్షుడు శ్రీ చాంద్ బాషా గారిని మంగళవారం ఉదయం హైదరాబాద్ లో జనసేన అధ్యక్షులు శ్రీ పవన్ కళ్యాణ్ గారు సన్మానించారు. దాదాపు 400 ఆవులతో గోశాలను నిర్వహించడంపై కొనియాడారు. శ్రీ చాంద్ బాషా గురించి తెలుసుకున్న శ్రీ పవన్ కళ్యాణ్ గారు ఆయన్ని హైదరాబాద్ పిలిపించుకొని సన్మానించారు. ఆయన చేస్తున్న సేవలను శ్రీ పవన్ కళ్యాణ్ గారు ప్రశంసించారు.
ఈ సందర్భంగా శ్రీ బాషా గారు మాట్లాడుతూ… “ఎక్కడో మారుమూల ప్రాంతంలో ఉన్న నన్ను హైదరాబాద్ పిలిపించి శ్రీ పవన్ కళ్యాణ్ గారు సన్మానించడం చాలా ఆనందంగా ఉంది. గోశాలకు ఎలాంటి సాయం కావాలన్న వెంటనే అడగమని చెప్పారు. గో ఆధారిత వ్యవసాయంపై అడిగి తెలుసుకున్నారు. గోమూత్రం, ఆవుపేడతో భూసారం పెంచే కషాయం, ఎరువులు తయారు చేస్తున్నామని తెలిసి అభినందించారు. ఈ విధమైన ప్రోత్సాహం నాలాంటివారికి చాలా స్ఫూర్తిని కలిగిస్తుంది” అన్నారు.
* రాయలసీమ జానపద రచయిత, గాయకుడు శ్రీ పెంచల్ దాస్ గారికి సత్కారం
శ్రీ పెంచల్ దాస్ గారు రాయలసీమ ప్రాంత జానపదాలను, అక్కడి మాండలికాన్నీ నేటి తరానికి చేరువ చేస్తున్న విధానం అభినందనీయం అని శ్రీ పవన్ కళ్యాణ్ గారు అన్నారు. గీత రచయిత, గాయకుడు శ్రీ పెంచల్ దాస్ గారు మంగళవారం హైదరాబాద్ లో శ్రీ పవన్ కళ్యాణ్ గారిని కలిశారు. ఈ సందర్భంగా తెలుగు జానపదాలు, సీమ మాండలికంపై ఇరువురు మాట్లాడుకున్నారు. ఈ చర్చలో ప్రముఖ దర్శకులు శ్రీ త్రివిక్రమ్ గారు పాల్గొన్నారు. అనంతరం శ్రీ పెంచల్ దాస్ గారిని శ్రీ పవన్ కళ్యాణ్ గారు సత్కరించారు.