గత కొంతకాలంగా హిట్ లేని అక్కినేని అఖిల్ ..ఎలాగైనా సరే ‘మోస్ట్ ఎలిజిబుల్ బ్యాచిలర్’ చిత్రంతో హిట్ కొట్టాలని తహతహలాడుతున్నాడు. బొమ్మరిల్లు భాస్కర్ డైరెక్షన్‌లో అఖిల్ నాల్గోవ సినిమాగా ఈ చిత్రం తెరకెక్కుతుంది . లాక్‌డౌన్ కారణంగా మోస్ట్ ఎలిజిబుల్ బ్యాచిలర్ సినిమా చివరి దశలో ఆగిపోయింది. ఈ క్రమంలో ఇటీవలనే తిరిగి షూటింగ్‌ను ప్రారంభించారు. అఖిల్ సరసన ఈ సినిమాలో హీరోయిన్‌గా పూజా హెగ్డే నటిస్తుండగా..జి2 పిక్చర్స్ పతాకంపై బన్నీ వాసు నిర్మిస్తున్నాడు. అల్లు అరవింద్ సమర్పిస్తున్నా ఈ సినిమాకు గోపి సుందర్ సంగీతం అందిస్తున్నాడు. అయితే మొన్నటి వరకు ఈ సినిమా సంక్రాంతి బరిలో రాబోతుందని ప్రచారం జరిగినప్పటికీ , తాజాగా వినిపిస్తున్న మాట ప్రకారం సంక్రాంతి బరిలో ఈ సినిమా రావడం లేదని తెలుస్తుంది.
చిత్రంలోని తన పాత్రకు సంబంధించిన షూటింగ్ హీరోయిన్ పూజాహెగ్డే ఇప్పటికే పూర్తి చేసిందని తెలుస్తోంది. కాకపోతే ఈ సినిమాలో కొన్ని కీలక సన్నివేశాల షూటింగ్ ఇంకా మిగిలి ఉండటంతో ఈ సినిమా పండక్కి రాకపోవచ్చని సినీ వర్గాల్లో టాక్ వినిపిస్తోంది. మరి సంక్రాంతి రేసు కాకుండా..మరెప్పుడు రిలీజ్ చేస్తారో చూడాలి.