సూపర్ స్టార్ మహేష్ బాబు సినీ కెరీర్లో నిలిచిపోయే సినిమాల్లో ఒక సినిమా పోకిరి. ఆ సినిమా ఇండస్ట్రీ హిట్ గా నిలవడంతో పాటు మహేష్ బాబుకు సూపర్ స్టార్ ఇమేజ్ ను తెచ్చిపెట్టింది. డాషింగ్ డైరెక్టర్ పూరి జగన్నాథ్ తెరకెక్కించిన ఆ సినిమాలో మహేష్ బాబు సరికొత్త గా కనిపించాడు. పోకిరి చేసినప్పటి నుంచి మహేష్ బాబు ఇండస్ట్రీలో టాప్ స్టార్ హీరో గా నిలిచాడు అనడంలో ఎలాంటి సందేహం లేదు. అంతటి సూపర్ హిట్ ఇచ్చిన దర్శకుడు పూరి జగన్నాథ్ తో కొన్నాళ్ల తర్వాత బిజినెస్ మేన్ సినిమాను మహేష్ బాబు చేసిన విషయం తెలిసిందే.
ఆ సినిమా యావరేజ్ టాక్ తెచ్చుకుంది.ఆ తర్వాత జనగణమన అనే సినిమాను చేసేందుకు పూరి గత మూడు సంవత్సరాలుగా మహేష్ బాబు డేట్ల కోసం వెయిట్ చేస్తున్నాడు. మహేష్ బాబు మాత్రం ఇతరులకు ఆఫర్లు ఇస్తున్నాడు కానీ పూరి జగన్నాథ్ కు మాత్రం ఆఫర్‌ ఇవ్వడం లేదు. పూరి ఒక ఇంటర్వ్యూలో మహేష్ బాబు ను ఉద్దేశించి పూరి మాట్లాడుతూ సక్సెస్ లో ఉన్నవాళ్ళు మాత్రమే మహేష్ కి కనిపిస్తారు అంటూ వివాదాస్పద వ్యాఖ్యలు చేశారు.
ఆ వ్యాఖ్యలకు మహేష్ బాబు ఫ్యాన్స్ చాలా సీరియస్ గా రియాక్ట్ అయి పూరి జగన్నాథ్ ట్రోల్స్ చేశారు. మహేష్ బాబు ఆ విషయమై ఎలాంటి స్పందన చేయలేదు అయినా కూడా మహేష్ కి పూరి పై కోపం ఉండే ఉంటుందని అంతా భావించారు. కానీ నిన్న పూరి జగన్నాధ్ బర్త్ డే సందర్భంగా మహేష్ బాబు తన అభిమాన దర్శకుడు అంటూ పూరిని సంభోధించడంతో ఇద్దరి మధ్య ఇంకా మంచి అనుబంధం కొనసాగుతుందని క్లారిటీ వచ్చేసింది.
ఎలాగు మహేష్ బాబు పూరి నీ అభిమాన దర్శకుడు అన్నావు కనుక పనిలోపనిగా జనగణమన సినిమాకు కూడా డేట్లు ఇస్తే బాగుంటుందని, పూరి చాలా నమ్మకంతో ఆ స్క్రిప్టుని పట్టుకొని ఉన్నాడు అని కచ్చితంగా పోకిరి లాంటి సినిమా అవుతుందని అభిమానులు ఆశపడుతున్నారు. మరి మహేష్ బాబు జనగణమన పాడేందుకు సిద్ధంగా ఉన్నాడా లేదా అనేది మరికొన్నాళ్లు అయితే కానీ తెలియదు.