టాలీవుడ్‌ స్టార్‌ హీరోయిన్‌ సమంత పెళ్లి అయినప్పటి నుండి కూడా ఛాలెంజింగ్‌ పాత్రలు చేస్తూ వస్తోంది. ఈ అమ్మడు యూటర్న్‌, జాను, ఓ బేబీ వంటి విభిన్నమైన సినిమాలు చేస్తూ నటిగా తనను తాను నిరూపించుకునేందుకు ప్రయత్నాలు చేస్తోంది. కెరీర్‌ ఆరంభం నుండి కేవలం గ్లామర్‌ రోల్స్‌ మాత్రమే చేసిన సమంత ఈమద్య కాస్త ప్రతిభ చూపించే పాత్రలు చేస్తోంది. ఈమె చేస్తున్న కొత్త సినిమాలు ఈమెలోని మరింత ప్రతిభను బయటకు తీయబోతున్నాయట.
తమిళంలో ఈమె ఇప్పటికే విఘ్నేష్‌ శివన్‌ దర్శకత్వంలో ఒక సినిమాను చేయబోతుంది. అందులో నయనతారతో కలిసి నటించేందుకు సిద్దం అయ్యింది. జనవరి నుండి ఆ సినిమా షూటింగ్‌ ఉంటుందని సమాచారం అందుతోంది. ఇదే సమయంలో ఈమె తెలుగులో నందిని రెడ్డి దర్శకత్వంలో ఒక సినిమాను చేసేందుకు సిద్దంగా ఉందట. ఇక తాజాగా మరో సినిమాకు ఈమె ఓకే చెప్పింది.
గేమ్‌ ఓవర్‌ అనే విభిన్నమైన హర్రర్‌ సినిమాను చేసిన అశ్విన్‌ శరవనన్‌ దర్శకత్వంలో సమంత ఒక సినిమా చేయబోతుంది. ఆ సినిమాలో కీలక పాత్రను విజయ్‌ సేతుపతి పోషించబోతున్నాడు. ఇక సమంత ఈ సినిమాలో లీడ్‌ రోల్‌ ను పోషించేందుకు ఓకే చెప్పిందట. అయితే సినీ వర్గాల ద్వారా అందుతున్న సమాచారం ప్రకారం ఈ సినిమాలో సమంత అంగవైకల్యంతో ఉన్న యువతి పాత్రలో కనిపించబోతుందట.
ఒక సమస్యపై తన అంగవైకల్యంతోనే పోరాడే పాత్రలో ఈమె కనిపించబోతుందని అంటున్నారు. సమంతకు ఈ సినిమాలో నటించేందుకు బోలెడంత స్కోప్‌ ఉంటుందని అంటున్నారు. కనుక ఖచ్చితంగా సమంతకు ఈ సినిమాతో నటన పరంగా మరిన్ని మార్కులు వచ్చే అవకాశం ఉంది. వచ్చ ఏడాదిలో ప్రారంభం కాబోతున్న ఈ సినిమాను వచ్చే ఏడాదిలోనే ప్రేక్షకుల ముందుకు తీసుకు వచ్చే అవకాశాలున్నాయని అంటున్నారు. సమంత ఈ పాత్ర కోసం చాలా ఎగ్జైట్‌ తో ఎదురు చూస్తుందట.