టాలీవుడ్‌ తో పాటు దేశవ్యాప్తంగా ఉన్న సినీ అభిమానులు ఆత్రుతగా ఎదురు చూస్తున్నారు ఆర్‌ ఆర్‌ ఆర్‌ మూవీ కోసం. రాజమౌళి, ఎన్టీఆర్‌, రామ్ చరణ్ కాంబినేషన్‌ లో తెరకెక్కిన చిత్రం ఆర్‌ ఆర్‌ ఆర్‌. జూనియర్‌ ఎన్టీఆర్‌ తో పాటు రామ్ చరణ్ ఇందులో తమ బెస్ట్‌ పర్ఫార్మెన్స్‌ ఇచ్చారని తెలుస్తోంది. అయితే రాజమౌళి సినిమాల్లో నటించిన హీరోలు భారీ హిట్‌ అందుకుంటారని అందరికీ తెలిసిందే. కానీ రాజమౌళితో సినిమా చేసి అదే హీరోతో వచ్చే తర్వాతి సినిమా ఫ్లాప్ అవుతుందని అందరూ అంటారు.
ఎందుకంటే రాజమౌళి మూవీ అంటే ఎంతో పెద్ద అంచనాలు ఉంటాయి. సినిమా టేకింగ్‌ దగ్గరి నుంచి పాటలు, విజువల్ ఎఫెక్ట్స్ ఇలా అన్ని రంగాలపై అంచనాలు భారీగా ఉంటాయి. అయితే ఈ అంచనాలు రాజమౌళి ఈజీగానే అందుకుంటారు. సినిమాను బ్లాక్‌ బాస్టర్‌ చేస్తారనడంలో ఏలాంటి సందేహం లేదు. రాజమౌళి హీరోలపైనా అదే స్థాయిలో అంచనాలు ఉంటాయి. భారీ హిట్‌ అందుకున్న తర్వాత వచ్చే సినిమాపై అంచనాలు ఆటోమెటిక్‌గా పెరిగిపోతాయి. ఇవే కొంపముంచుతాయని అంటాయి సిని వర్గాలు. ఈ అంచనాలు అందుకోలేక చాలా మూవీస్ ఫ్లాప్ అవుతుంటాయని చెబుతారు.
అయితే ఆర్‌ ఆర్‌ ఆర్‌ తర్వాత రామ్ చరణ్ తర్వాతి మూవీపై అంచనాలు భారీగా పెరిగిపోయాయి. ఎందుకంటే రాజమౌళి లాంటి గొప్ప దర్శకుడి సినిమాలో నటించిన తర్వాత.. అదే స్థాయి పేరు ఉన్న మరో దక్షిణాది దర్శకుడైన శంకర్‌తో రామ్ చరణ్ మూవీ చేస్తున్నారు. ఈ సినిమాలో రామ్ చరణ్ సరసన కియారా అద్వానీ నటిస్తోంది. ఇదో పొలిటికల్‌ డ్రామా అని టాక్‌ వినిపిస్తోంది.
సీఎంగా గెలిచే ఐఏఎస్‌ ఆఫీసర్‌గా చరణ్ నటిస్తున్నారని తెలుస్తోంది. ఒకే ఒక్కడు మూవీకి ఇది సీక్వెల్ అనే టాక్‌ నడుస్తోంది. ఈ చిత్రానికి కార్తీక్‌ సుబ్బరాజ్‌ కథ అందిస్తున్నారు. ఈ విషయాన్ని స్వయంగా కార్తీక్‌ సుబ్బరాజే ఓ ఇంటర్వ్యూలో చెప్పారు. పేట, జగమే తంత్రం లాంటి సినిమాలు తీసిన కార్తీక్‌ కథలు ఎలా ఉంటాయో తెలిసిందే. అతని మాస్‌ కథకి శంకర్‌ క్లాస్‌ టేకింగ్‌ కలిస్తే ఎలా ఉంటుందో వేచి చూడాల్సిందే.