విభిన్న చిత్రాల దర్శకుడు ఇంద్రగంటి మోహన్ కృష్ణ దర్శకత్వంలో తెరకెక్కిన చిత్రం ‘V’.. ఈ సినిమాలో నాని, సుధీర్ బాబు ప్రధాన పాత్రలు పోషించగా, అదితీరావ్ , నివేత థామస్ హీరోయిన్లుగా నటించారు. ఇది నాని కి 25 వ చిత్రం కావడం విశేషం.. ఈ సినిమాని శ్రీ వెంకటేశ్వర క్రియేషన్స్ పతాకంపై ప్రముఖ నిర్మాత దిల్ రాజు నిర్మించారు.. అమిత్‌ త్రివేది సంగీతమందించారు. కరోనా వలన వాయిదా పడుతూ వచ్చిన ఈ సినిమా సెప్టెంబర్ 05 న అమెజాన్‌ ప్రైమ్‌ లో రిలీజ్ అయింది. ఈ ఏడాది ఓటీటీలో రిలీజైన తెలుగు సినిమాల్లో ఎక్కువమంది వీక్షించిన మూవీగా ఇది నిలిచినప్పటికీ.. హిట్ టాక్ మాత్రం తెచ్చుకోలేకపోయిది. అంతే కాదు ఇప్పుడీ సినిమా బుల్లితెరపై కూడా హిట్ టాక్ తెచ్చుకోలేక అభిమానులను నిరాశకు గురి చేసింది.
వరల్డ్ టెలివిజన్ ప్రీమియర్ గా తాజాగా జెమినీ టీవీలో ఈ సినిమాను ప్రసారం చేస్తే.. కేవలం 6.8 రేటింగ్ మాత్రమే వచ్చింది. కనీసం నాని గత సినిమాలతో పోల్చి చూసినా ఇది తక్కువ రేటింగ్ కిందే అని చెప్పవచ్చు. నాని గత చిత్రం గ్యాంగ్ లీడర్ కు 8.6 టీఆర్పీ రాగా.. అంతకంటే ముందు నటించిన జెర్సీ సినిమాకు 8.8 రేటింగ్ వచ్చింది. దాని ముందు సినిమా దేవదాస్ కు కూడా 8.3 టీఆర్పీ వచ్చింది. వీటితో పోల్చి చూస్తే వి సినిమా స్మాల్ స్క్రీన్ పై ప్లాప్ అయినట్టే లెక్క.