సూపర్‌ స్టార్‌ మహేష్ బాబు ప్రస్తుతం సర్కారు వారి పాట సినిమా ను చేస్తుండగా టాలీవుడ్‌ జక్కన్న రాజమౌళి ఆర్ఆర్ఆర్ సినిమా షూటింగ్ తో బిజీగా ఉన్నారు. వీరిద్దరు కూడా వచ్చే ఏడాదిలో కలిసి సినిమా చేయబోతున్నారు అనేది టాక్‌. వీరి కాంబో కోసం గత నాలుగు అయిదు సంవత్సరాలుగా అభిమానులు వెయిట్‌ చేస్తున్నారు. బాహుబలి సమయంలోనే మహేష్ బాబు తో ఒక సినిమా చేయాల్సి ఉందంటూ రాజమౌళి చెప్పుకొచ్చాడు. ఆ సినిమా షూటింగ్ ముగింపు దశకు వచ్చిన తర్వాత మహేష్ బాబుతో కాకుండా భారీ మల్టీ స్టారర్‌ ను చేయాలనే ఉద్దేశ్యంతో ఆర్ఆర్ఆర్ ను మొదలు పెట్టాడు. కాని తదుపరి సినిమా మాత్రం ఖచ్చితంగా మహేష్ బాబుతో ఉంటుందని కన్ఫర్మ్‌ అయ్యింది.
ఇప్పటికే స్టోరీ లైన్ కూడా సిద్దం అయ్యిందని సమాచారం అందుతోంది. విశ్వసనీయంగా అందుతున్న సమాచారం ప్రకారం ఇటీవలే మహేష్ బాబును కలిసి స్టోరీ లైన్ విషయమై చర్చించినట్లుగా సమాచారం అందుతోంది. భారీ ఎత్తున వీరి కాంబో మూవీపై అంచనాలు ఉంటాయి. ఆ అంచనాలకు ఏమాత్రం తగ్గకుండా ఈ సినిమాను రూపొందించబోతున్నట్లుగా తెలుస్తోంది. ప్రస్తుతం సినిమాకు సంబంధించిన కథ విషయంలో విజయేంద్ర ప్రసాద్‌ మరియు ప్రముఖ రచయితలు కలిసి చర్చలు జరుపుతున్నారు.
మహేష్ బాబు మరియు రాజమౌళిల భేటీలో కథ చర్చలు జరిగాయని, ముఖ్య పాత్రలకు సంబంధించిన ఎంపిక విషయమై కొన్ని సలహాలు సూచనలు తీసుకున్నట్లుగా తెలుస్తోంది. కథ విషయమై మహేష్ బాబుకు సంతృప్తి వ్యక్తం చేశాడని అంటున్నారు. పాత్ర కోసం మహేష్ బాబు బాడీ లాంగ్వేజ్‌ ఎలా ఉండాలి, ఎలాంటి మార్పులు చేర్పులు చేయాల్సి ఉంటుందనే విషయాన్ని చర్చించారనే వార్తలు వస్తున్నాయి.