లెక్కల మాస్టర్ సుకుమార్ మరోసారి ఓ ఇంటివాడయ్యాడు. ఇంటివాడు అనగానే మళ్లీ పెళ్లి చేసుకున్నాడా..అని షాక్ అవ్వకండి. మీము చెప్పేది కొత్తగా ఇల్లు కొనుగోలు చేసాడని. ఇప్పటికే ఈయనకు హైదరాబాద్‌లో ఓ ఫ్లాట్ ఉంది. ఇప్పుడు మరో ఖరీదైన విల్లా తీసుకున్నట్లు తెలుస్తుంది. హైదరాబాద్ లోని కొండాపూర్ ప్రాంతంలో 12 కోట్లు ఖర్చు చేసి ఈయన విల్లా తీసుకున్నట్లు సమాచారం. ఇది మహేష్ బాబు ఏఎంబి సినిమాస్‌కు దగ్గర్లోనే ఉందట. చాలా తక్కువ మంది కుటుంబ సభ్యులు, సన్నిహితుల సమక్షంలో గృహప్రవేశం కూడా చేసాడని.. ఈ వేడుకకు అల్లు అర్జున్ కూడా హాజరైనట్లు వార్తలొస్తున్నాయి.
పుష్ప సినిమాకు రెండు రోజులు బ్రేక్ ఇచ్చి మరీ మంచి ముహూర్తం చూసుకుని గృహ ప్రవేశం చేసాడు సుకుమార్. మళ్లీ వెంటనే పుష్ప సినిమాతో బిజీ అయిపోయాడు. ప్రస్తుతం ఈ చిత్ర షూటింగ్ గోదావరి జిల్లాల్లోని అటవీ ప్రాంతంలో జరుగుతుంది. ‘రంగస్థలం’ లాంటి ఇండస్ట్రీ హిట్ తర్వాత సుకుమార్.. అల వైకుంఠపురములో లాంటి ఇండస్ట్రీ హిట్ తర్వాత అల్లు అర్జున్ కలిసి చేస్తున్న సినిమా కావడంతో అంచనాలు కూడా అలాగే ఉన్నాయి. ముత్తంశెట్టి మీడియాతో కలిసి మైత్రీ మూవీ మేకర్స్ బ్యానర్‌పై నవీన్ యెర్నేని, వై. రవిశంకర్ ఈ సినిమాను నిర్మిస్తున్నారు. గందపు చెక్కల స్మగ్లింగ్ నేపథ్యంలో సినిమా కథ సాగుతుంది. రష్మిక హీరోయిన్ గా నటిస్తుండగా , దేవి శ్రీ మ్యూజిక్ అందిస్తున్నాడు.