పవన్‌ కళ్యాణ్‌ దాదాపు రెండేళ్లు గ్యాప్‌ తీసుకుని బాలీవుడ్‌ పింక్‌ మూవీని ‘వకీల్‌ సాబ్‌’ గా రీమేక్‌ చేసేందుకు సిద్దం అయ్యాడు. దిల్‌ రాజు బ్యానర్‌లో రూపొందుతున్న ఆ సినిమా కరోనా కారణంగా ఆగిపోయింది. షూటింగ్‌ ఎప్పుడు ప్రారంభం అయ్యేది ఎప్పుడు విడుదల అయ్యేది ఇంకా క్లారిటీ రాలేదు.
వకీల్‌ సాబ్‌ కాకుండా పవన్‌ 27వ సినిమాగా క్రిష్‌ దర్శకత్వంలో మూవీని 28వ సినిమాగా హరీష్‌ శంకర్‌ దర్శకత్వంలో సినిమాను చేయబోతున్నట్లుగా వార్తలు వచ్చాయి. అందుకు సంబంధించిన అధికారిక ప్రకటన కూడా వచ్చింది. కాని సినిమా షూటింగ్‌ లు ఆలస్యం అవుతున్న కారణంగా ఆ రెండు సినిమాల్లో ఏదైనా క్యాన్సిల్‌ అయ్యేనా అంటూ అనుమానాలు వ్యక్తం అయ్యాయి.
కాని పవన్‌ బర్త్‌ డే సందర్బంగా ఆ రెండు సినిమాలపై క్లారిటీ ఇవ్వడంతో పాటు మరో సినిమా కూడా పవన్‌ లైన్‌లో పెట్టాడు అంటూ తేలిపోయింది. క్రిష్‌ మరియు హరీష్‌ శంకర్‌ల మూవీలు కాకుండా సురేందర్‌ రెడ్డి దర్శకత్వంలో రామ్‌ తాళ్లూరి నిర్మాణంలో ఒక సినిమాను పవన్‌ చేయబోతున్నట్లుగా క్లారిటీ వచ్చేసింది.
ఈ విషయంలో కూడా అధికారిక ప్రకటన రావడంతో పవన్‌ ఫ్యాన్స్‌ ఫుల్‌ హ్యాపీగా ఉన్నారు. సురేందర్‌ రెడ్డి వంటి కమర్షియల్‌ స్టైలిష్‌ డైరెక్టర్‌ తో పవన్‌ మూవీ చేయబోతున్న నేపథ్యంలో అంచనాలు ఆకాశాన్ని తాకేలా ఉన్నాయి. ఈ నాలుగు సినిమాలకు సంబంధించిన క్లారిటీ ఇవ్వడంతో ఫ్యాన్స్‌ ఖుషీ అవుతున్నారు.
ముఖ్యంగా పవన్‌ 27వ సినిమా ప్రీ లుక్‌ తో క్రిష్‌ కుమ్మేశాడు. ఇక హరీష్‌ శంకర్‌ కూడా ఈసారి ఎంటర్‌టైన్‌మెంట్‌ మాత్రమే కాదు ఇంకా అంతకు మించి ఉంటుందని చెప్పడంతో అంచనాలు పెరిగి పోతున్నాయి. ఈ నాలుగు సినిమాల్లో రెండు వచ్చే ఏడాది మరో రెండు 2022లో విడుదల అయ్యే అవకాశం ఉంది.