ప్రభాస్‌ హీరోగా సాహో సినిమా తర్వాత చేస్తున్న సినిమా రాధేశ్యామ్‌. ఈ సినిమాకు రాధాకృష్ణ దర్శకత్వం వహిస్తున్నాడు. విభిన్నమైన స్ర్కీన్‌ ప్లే 1980 నేపథ్యంలో రూపొందుతున్న సినిమాలో ప్రభాస్‌ కొత్త లుక్‌ లో కనిపించబోతున్నాడు. సాహో సినిమా హిందీలో ఓ రేంజ్‌ వసూళ్లను దక్కించుకుంది. అందుకే ఈ సినిమాపై అంచనాలు పీక్స్‌ లో ఉన్నాయి. యూవీ క్రియేషన్స్‌ వారు ఈ సినిమాను ఏకంగా 250 కోట్ల బడ్జెట్‌ తో నిర్మిస్తున్నట్లుగా సమాచారం అందుతోంది.
ఇక ఈ సినిమాను లాక్‌ డౌన్‌కు ముందు యూరప్‌లో చిత్రీకరించారు. కరోనా మహమ్మారి విజృంభిస్తున్న నేపథ్యంలో అక్కడ నుండి హడావుడిగా యూనిట్‌ సభ్యులు ఇండియాకు వచ్చేశారు. గత ఆరు నెలలుగా షూటింగ్స్‌ అన్ని కూడా బంద్‌ అయ్యాయి. రాధేశ్యామ్‌ సినిమా షూటింగ్‌ కూడా జరగడం లేదు. హైదరాబాద్‌ లో భారీ సెట్టింగ్‌ వేస్తున్నారు. సినిమాను త్వరలో మొదలు పెట్టబోతున్నారు అంటూ రెండు నెలలుగా ప్రచారం జరిగింది.
కాని విశ్వసనీయంగా అందుతున్న సమాచారం ప్రకారం సినిమాను మళ్లీ యూరప్‌ లోనే మొదలు పెట్టబోతున్నారట. అక్కడ దాదాపు నెల రోజుల షూటింగ్‌ తర్వాత ఇండియాకు వచ్చి రామోజీ ఫిల్మ్‌ సిటీలో వేసిన సెట్టింగ్‌లో రెండు నెలల షూటింగ్‌ చేస్తారు. దాంతో షూటింగ్‌ మొత్తం పూర్తి అయినట్లు అవుతుంది. ఈ సినిమాలో ప్రభాస్‌కు జోడీగా పూజా హెగ్డే నటిస్తోంది. హీరోయిన్‌ కు ఈ సినిమాలో చాలా ముఖ్యమైన పాత్ర ఉంటుందట. అందుకే ఈ సినిమా ఫస్ట్‌ లుక్‌ సమయంలోనే పూజా హెగ్డే పాత్రకు సంబంధించిన లుక్‌ ను రివీల్‌ చేశారు.
త్వరలోనే సినిమా షూటింగ్‌ మొదలు పెట్టిన తర్వాత టీజర్‌ను విడుదల చేస్తారట. వచ్చే ఏడాది సమ్మర్‌ చివరి వరకు సినిమాను విడుదల చేయాలని భావిస్తున్నారు. ఈ సినిమా పూర్తి అయితే నాగ్‌ అశ్విన్‌ మూవీ మరియు ఆదిపురుష్‌ సినిమాలను ప్రభాస్‌ వచ్చే ఏడాది చేయబోతున్నాడు. ఆ రెండు సినిమాలు కూడా 2022లో ప్రేక్షకుల ముందుకు రాబోతున్నాయి.