కింగ్ నాగార్జున హోస్ట్ గా స్టార్ మా లో 2014 లో వచ్చిన మీలో ఎవరు కోటీశ్వరుడు ప్రోగ్రాం ఎంత మంచి సక్సెస్ అయ్యిందో ప్రతి ఒక్కరికి తెలిసిన విషయమే. ట్యాలెంట్ ఉన్న ప్రతి ఒక్కరు ఈ ప్రోగ్రాం ద్వారా డబ్బులు సంపాదించుకున్నారు. ఆ సమయంలో అత్యధిక టిఆర్పి రేటింగ్ ను దక్కించుకుంది. మొత్తంగా మూడు సీజన్లకు నాగ్ హోస్ట్ గా వ్యవహరించాడు.
2015 లో నాలుగోవ సీజన్ కు గాను మెగాస్టార్ చిరంజీవి హోస్ట్ గా వచ్చాడు. ఈ షో మొత్తం 60 ఎపిసోడ్స్ గా రన్ అయ్యింది.. ఆ తర్వాత స్టార్ మా వారు ఈ షో ను కొనసాగించలేదు. ఇప్పుడు ఇదే షో మరోసారి తెరపైకి వచ్చింది. టాలీవుడ్ మీడియా ఈ షో గురించి గత కొన్ని నెలలుగా ఆసక్తికర విషయాలను రాస్తుంది. ఇటీవలే స్టార్ మా వారి నుండి ఈ షో కు సంబందించిన హక్కులను మరియు అగ్రీమెంట్స్ ను జెమిని టివి వారు దక్కించుకున్నారు. మీలో ఎవరు కోటీశ్వరుడు ప్రోగ్రాం పేరును చేంజ్ చేస్తూ “ఎవరు మీలో కోటీశ్వరులు” గా రాబోతుంది
అన్నపూర్ణ స్టూడియోలో భారీ సెట్ ను నిర్మించారు. ఈ షో జెమిని టివి లో ప్రసారం అవ్వనున్నది. ఈ షో కు ఎవరు హోస్ట్ గా వస్తున్నారు అనే విషయంపై జెమిని టివి యాజమన్యం గత కొన్ని నెలలలుగా సతమతం అవ్వుతూనే ఉంది. చివరకు ఈ షో కు హోస్ట్ కోసం జూనియర్ ఎన్టీఆర్ ను సంప్రదించింది. ఆయన గతంలో బిగ్ బాస్ సీజన్ వన్ కు హోస్ట్ గా పనిచేశాడు. ఆ అనుభవంతోనే ఎన్టిఆర్ ను మరోసారి ఎవరు మీలో కోటీశ్వరులు ప్రోగ్రాం కోసం రంగంలోకి దింపుతుంది.
అందుకు ఎన్టీఆర్ కు రెమ్యూనరేషన్ కూడా బాగా ముట్టజెప్పినట్లుగా సమాచారం. ఇటీవలే త్రివిక్రమ్, ఎన్టీఆర్ లు కలిసి ప్రమోషన్ యాడ్ షూట్ ను కూడా చేశారు. త్వరలో అది టెలికాస్ట్ అవ్వనున్నది. ఏప్రిల్ నుండి జెమిని టివి లో తారక్ హోస్ట్ గా ఎవరు మీలో కోటీశ్వరులు ప్రోగ్రాం మొదలవ్వనున్నది. ఈ నేపథ్యంలోనే ఎన్టీఆర్, త్రివిక్రమ్ కాంబినేషన్లో అయిననూ పోయిరావలే హస్తినకు అనే చిత్రం రూపొందనున్నది. చిత్రం యొక్క టైటిల్ గురించి అధికారిక ప్రకటన మాత్రం రాలేదు. త్వరలో వచ్చే అవకాశం ఉంది.
